Продолжува победничката серија на Хрватска, Норвешка подобра од светскиот шампион
Ракометарките на Хрватска со победа ја започнаа и втората фаза на Европското првенство и го задржаа максималниот ефект во континелниот собир.
Последна жртва на хрватските ракометарки е селекцијата на Романија која е совладана со 25:20.
Одличната серија на „коцкестите“ беше доведена во прашање на почетокот од натпреварот кога романките поведоа со 5:8, но потоа ракометарките на Хрватска ја кренаа одбраната на едно повисоко ниво и на полувреме заминаа со предност од четири гола (14:10).
Во вториот дел, Хрватска имаше целосна контрола на случувањата на теренот и сосема заслужено дојде до четвртата победа во четвртиот натпревар на ЕП во Данска.
Валентина Блажевиќ со седум гола беше најпрецизна кај „коцкестите“, додека во редовите на Романија, Кристина Неагу даде шест гола.
Максималниот учинок го задржаа и Франција и Норвешка откако вечерва беа поуспешни од Шпанија односно Холандија.
Французинките со 26:25 ја совладаа Шпанија, додека Норвешка улогата на главен фаворит за титулата ја оправда со убедливиот триумф над светскиот шампион Холандија од 32:25. Кај Норвежанките блескаше Нора Морк која постигна осум гола.
Минимален триумф оствари и Русија која со 24:23 ја совлада Црна Гора и е четвртата селекција која има максимални четири победи во четири натпревари.