Претставник од ВМРО-ДПМНЕ повикан да дојде на судењето за „Талир 2“
Судијката Даниела Алексовска-Стојановска поради доуредување на полномоштвата на адвокатите и неприсуство на претставник на ВМРО-ДПМНЕ, го одложи процесот „Талир 2“ за 15 октомври во 9.30 часот.
– Барам за следното рочиште да биде повикан и претставник од ВМРО-ДПМНЕ бидејќи се преземени мерки за обезбедување на имотот и тие имаат право да учествуваат во постапката – рече обвинителката Ленче Ристоска.
Во случајот „Талир 2″ обвинети се поранешниот премиер Никола Груевски и поранешниот генерален секретар на владата Кирил Божиновски, кои, според обвинението на СЈО, со злоупотреба на службената положба, овозможиле правното лице ДГ Бетон АД Скопје да го изгради седиштето на политичката партија ВМРО-ДПМНЕ, иако правното лице во времето на обезбедување на услугата имало склучено договори за јавни набавки со државни органи и јавни установи или претпријатија спротивно на Законот за политички партии, Законот за финансирање на политички партии и Законот за облигациони односи.