Премиерот на Австралија Скот Морисон изјави дека одлуката за укинување на визата за српскиот тенисер Новак Ѓоковиќ е донесена од здравствени и безбедносни причини и од јавен интерес.

Претходно австралискиот министер за имиграција, Алекс Хоук, ја пофали одлуката на австралискиот Федерален суд, со која се потврди неговата претходна одлука да му ја одземе визата на тенисерот Новак Ѓоковиќ, изјавувајќи дека одлуката е донесена за да се зачува безбедноста на австралиската заедница.

По едногласната одлука на тричлениот судски совет, Ѓоковиќ ќе биде депортиран од Австралија и нема да ја брани титулата на Австралија опен.

Одлуката за укинување на визата ја донел министерот за имиграција, Алекс Хоук, бидејќи, според него, присуството на невакциниран играч може да поттикне противење на вакцинацијата против коронавирус, но и поради загриженоста за јавното здравје.

„Како што реков во петокот, Австралијците претрпеа многу жртви за време на оваа пандемија и со право очекуваат исходот од овие жртви да биде заштитен. За време на пандемијата, заедно постигнавме една од најниските стапки на смртност, најсилните економии и најсилните стапки на вакцинација во светот се основни за австралискиот начин на живот, како и за владеењето на правото“, рече Морисон.

„Нашата влада отсекогаш го разбираше ова и беше подготвена да ги преземе одлуките и активностите неопходни за заштита на интегритетот на нашите граници. Му благодарам на Судот за неговото брзо внимание на овие прашања и за трпението на сите вклучени додека работевме на нивно решавање. Сега е време да започнеме со отворена Австралија и да се вратиме на уживањето во тенисот во текот на летото“, додаде Морисон.

Во понеделник во Мелбурн започнува првиот Грен слем турнир во сезоната.

Ѓоковиќ: Крајно сум разочаран, но ја почитувам пресудата