Празнично интервју со Сашко Коцев: Новата година ме потсетува на детството, сцената и храброста да се направи чекор повеќе
Еден од најпознатите и најпочитувани македонски актери, Сашко Коцев, влезе во 2026 година со препознатливата комбинација од искреност, хумор и животна мудрост.
Препорачано
Во разговор за „Слободен печат“ на тема новогодишните и божиќните празници, тој се наврати на детските спомени кои и денес му будат насмевка, ги сумираше лекциите научени во 2025 година и откри што за него значат успехот, семејството и инспирацијата.
Иако зад себе има богата актерска кариера, Коцев признава дека празниците секогаш го враќаат во детството во оние мали, хаотични и топли моменти што остануваат врежани засекогаш.
Кога ќе почне новогодишната еуфорија вклучувајќи ги божиќните празници, која традиција од детството прва ти те потсетува на овој период?
– Секогаш 31 декември навечер. Ѕвонче на врата – „динг донг“, па: „Здравооо, ајдеее влезете … ааа, па не требаше …“ бакнувања со тетин и тетката, викање низ станот: „Затворете ја вратата, се излади собата“, „не со жижиците тука“ и некаде во целата таа врева – „Сашко, Сашкооо!“.
По „Среќна Нова година“, јас заспивам меѓу јакните и капутите во ладната соба, додека возрасните уште вреват во дневната (ха, ха, ха).
Која е највредната лекција што ти ја донесе 2025 година?
– Да застанеш и да изброиш до 10.
Кој момент од минатата година го доживуваш како лична или професионална пресвртница?
– Имаше повеќе. Снимав три различни серии во Белград, што беше голем професионален предизвик. Сопругата стана доцент на Медицинскиот факултет, нешто со што сум бескрајно горд. А ќерка ми свиреше клавир на настап… таму не издржав, се расплакав додека ја гледав.
Со што сакаш да се разделиш од 2025, а што сигурно го носиш со себе во 2026?
– Често зборуваме за тоа што сме го направиле, но уште почесто за она што сме го мислеле, а не сме се осмелиле да го направиме. Би сакал оваа 2026 да има повеќе храброст токму за тие, ненаправените работи.
Што те инспирираше најмногу во изминатата година?
– Сцената на Македонскиот народен театар.
Како изгледаше твојот дочек на Новата година?
– Малку доцна накитивме дома, ама со стандардните божиќни песни што почнуваат да се вртат на радио уште од 25 ноември. Дочекот беше домашна журка, а јас бев диџејот. Искрено, топ бев до четвртата песна.
