ПОВТОРНО ДРАМА ПРЕД ЕЛ КЛАСИКО: Полицијата не може да им ја гарантира безбедноста на „кралевите“
Најочекуваниот фудбалски натпревар, популарното Ел Класико помеѓу Барселона и Реал Мадрид повторно е под знак прашалник. Дербито помеѓу двата шпански гиганти веќе еднаш беше одложено поради политичките тензии во Каталонија, а новиот термин е 18 декември, но како се наближува денот на одигрување на натпреварот, така се зголемуваат шансите за ново одложување.
Шпанија има свое Министерство за внатрешни работи, полициски сили задолжени за ред, мир и безбедност во државата, но и Каталонија има своја автономна полиција „Mossos d’Esquadra“ која на територијата на покраината ги врши должностите и на шпанската полиција и на цивилната гарда.
Токму каталонската полиција денеска на насловната страница на „Марка“ му порачаа на Реал Мадрид:
„Почитувани, во Барселона никој не може да ви ја гарантира безбедноста!“.
За полицијата најкритично би било движењето на фудбалерите на Реал од аеродромот во Барселона до хотелот, а потоа и од хотелот до „Камп Ноу“. Полицијата стравува дека за 10-тина дена повторно ќе се интензивираат протестите во Барселона и нема да можат да конторлираат маса од неколку десетини илјади луѓе.
Челниците на Реал Мадрид ја разгледуваат и опцијата да пристигнат во Барселона на денот на одигрување на натпреварот, но и за оваа опција засега немаат гаранции за безбедноста.
Граѓаните на Барселона масовно протестираа низ улиците на градот барајќи ослободување на затворените каталонски службеници, а бидејќи Ел Класико е дуел помеѓу каталонската и шпанската гордост, каталонската полиција стравува од интензивирање на немирите токму на 18 декември.
Засега постојат две опции за да се осигура безбедноста на фудбалерите на Реал Мадрид, едната е да се затвори една лента од коловизот од аеродромот со хотелот во кој ќе бидат фудбалерите, а другата е да биде поставен кордон од полиција и гарда на целата траса по која ќе минува автобусот со гостинските играчи.