Полемика во Франција за забраната за дистрибуција на оброци на мигрантите во Кале
Префектурата Па-де-Кале им забрани на здруженијата кои немаат мандат од државата да дистрибуираат оброци на мигранти до крајот на септември, што наиде на осуда од засегнатите хуманитарни здруженија, јави дописникот на МИА.
За време на разговорот меѓу градоначалничката на Кале Наташа Бушар и министерот за внатрешни работи Жералд Дарманан, таа предупредила за „еволуцијата на миграцискиот проблем” што таа смета дека е „загрижувачки од почетокот на летото”, се вели во соопштението од градското собрание на Кале. Таа особено го осудува „возобновувањето на нарушувањата на јавниот ред и мир забележано веќе неколку недели”, со „места за фиксирање” во центарот на градот особено поврзани со делењето на оброците „организирани на целосно анархичен начин”.
Според декретот на префектурата, распределбата на оброци од здруженија кои немаат мандатни од државата се „карактеризираат со непочитување на мерките за социјално дистанцирање како дел од борбата против Ковид-19″, „тие создаваат непријатност “и „ отпадот останува на овие места “.
Градското собрание и префектурата сметаат дека овие здруженија не треба да го заменуваат здружението што е финансирано од државата „Ла Ви Актив”. Оваа организација обезбедува „4 дневни распределби на оброци”, за мигрантите и им има ставено на располагање 38 славини за вода 5 дена во неделата, од кои „22 се достапни 7 дена во неделата”, покрај водата што се дистрибуира за време на оброците, прецизира префектурата. Префектурата уверува дека оваа организација им „обезбедува на мигрантите доволни хуманитарни услуги во однос на потребите на ова население, особено за храна”.
Од „Ла Ви Актив” велат дека дистрибуираат 1.000 до 1.200 појадоци и исто толку ручеци во Кале, на две различни локации. Здружението осигурува дека ќе го снабдува „мнозинството” присутни мигранти.
Градското собрание веќе се обиде во неколку наврати да забрани дистрибуција на оброци на мигранти на одредени места. Таа донесе декрет за ова во октомври 2019 година. Тоа го стори и во март 2017 година. Но, во декември 2019 година, управниот суд во Лил, кој тогаш беше повикан да се изјасни од здруженијата, донесе одлука дека градското собрание е„ненадележно” да земе ваков вид одлуки. „Полицијата е контролирана од државата во општината Кале, префектот е тој кој треба да донесе такви одлуки “, објаснија тогаш судиите.
Од друга страна, во здруженијата кои делеа храна, оваа нова забрана беше пречекана со критики.
На оваа забрана се огласија и Амнести Интернешнл, Лекари на светот и Лекари без граници. Во заедничката изјава, тие ги повикуваат „француските власти” да ја повлечат „својата одлука”.
За Амнести Интернешнл, која го проценува бројот на мигранти присутни во Кале и неговата околина на 1.500, одлуката „претставува понатамошно демонстрирање на малтретирањето на кое се подложени бранителите на правата на мигрантите во регионот”. „Забранувајќи ја хуманитарната акција на граѓаните, тоа се братство и солидарноста (…) кои се газат. Тоа е неподносливо “, изјави Вероник Фајет, претседателка на Секур Католик- Каритас Франција.