И покрај најавите дека би можел да ја продолжи кариерата во НБА лигата, Пау Гасол (41) сепак се враќа во Европа, поточно во својата Барселона.

Оваа вест ексклузивно ја објави „Мундо Депортиво“, традиционално близок до каталонскиот клуб, и дека двете страни се договорија околу соработката. Повозрасниот од браќата Гасол се очекува веќе во наредните денови да им се придружи на новите соиграчи на тренинзите.

Имаше желба повторно да биде дел од НБА, но процени дека поважно е да ја темпира формата за Олимписките игри во Токио каде веројатно ќе заврши со активното играње кошарка.

Можеби проблем ќе биде тоа што на паркетот не е од сезоната 2018/2019 кога запиша само три настапи во дресот на Милвоки Бакс.

Кариерата ја започна токму во Барса пред 20 години, а подоцна двапати беше шампион во НБА лигата со Лос Анџелес Лејкерс. Со репрезентацијата на Шпанија беше европски и светски првак.