Во моментот не може да се претпостави какви ќе бидат штетите од пролетниот снег врз овошките, а се ќе зависи од тоа дали до крајот на неделата ќе има поголеми студови и мраз. Иако, надвор времето повеќе наликува како да почнува зимата, агрометеоролозите потсетуваат дека веќе трета година по ред на 22 и 23 март врне снег, а со дебела снежна покривка го дочекавме и ланскиот 10 април.

Ангелко Ангелевски од Управата за хидрометеоролошки работи за „Слободен печат“, вели дали ќе има поголеми штети кај овошките, ќе зависи од разведрувањето и колку време ќе се задржат минусните температури. Ангелевски појаснува дека овошките издржуваат до минус два степени.

-Ваква пролет е вообичаена во последниве години. Топлите денови на крајот на февруари и на почетокот на март, ги расцутеа овошките, кајсијата, праската и вишните, но не е исто дали снегот паѓа на отворен или затворен цвет. За среќа во Беровско и Охридско-преспанскиот регион, овошките подоцна цутат, па тие се позаштитени – објаснува Ангелевски, потсетувајќи дека и лани имаше пролетен снег, па имавме прилично добар род кај овошките. 

Од снегот оправдано се плашат и пчеларите, кои се загрижени дека пчелите ќе немаат доволно храна, а дополнително се чувствителни на студеното време. Последниве години, мед има се помалку, бидејќи во време кога по правило, пчелите излегуваат да си приберат дел од поленот, времето е многу студено.

-Овој снег е прилично влажен и ќе го надополни недостигот на влага во почвата за земјоделските посеви, особено кај житата. Вообичаено на почетокот на јануари, се врши прихранување на посевите, па овие снегови и дождови ќе помогнат да се растворат хранливите супстанци. Врнежите се добредојдени и за надополнување на акумулациите, кои беа речиси испразнети по есенската суша – објаснува агрометеорологот Ангелевски.