Лисиче наскоро ќе започне да се урбанизира, најавуваат од Општина Аеродром. Од оваа скопска општина велат дека за правилен и рамномерен развој на Општина Аеродром, урбанизацијата на Лисиче е неопходна.

– Конкретно за местото викано Бановина предвидена е урбанизација, заради што наскоро очекуваме да почнеме со изработка на нов ДУП за овој дел од Лисиче, како и за другите делови од Лисиче кои беа заборавени – велат од Општината од каде што потенцираат дека, еден од приоритетите на новата локална самоуправа ќе биде и заштита на животната средина, што подразбира и чистење на постојните депонии, кои за жал како што велат оттаму, изминативе години се заборавени.

Од оваа скопска општина нагласуваат дека првиот работен ден градоначалникот Тимчо Муцунски го искористил за да прати јасна порака до сите што создаваат диви депонии дека во иднина тоа нема да се толерира.