Иран и натаму се залага за опстојување на договорот за иранската нуклеарна програма, па со таа цел ја повикаа Европа да се преземат „практични и ефикасни мерки“.

Според зборовите на портпаролот на иранската дипломатија Абас Мусави, не е реално да се очекува Иран да се врати на условите пред 8 мај 2019 година, а Европејците да не покажат политичка волја и способност, и да дозволат Иран во пракса да го користи договорот.

Мусави реагирал на повикот на Франција, Велика Британија и Германија, кои го имаат потпишано меѓународниот договор за иранската нуклеарна програма, со цел иранските власти да ги смират тензиите и да го продолжат дијалогот.

„Загрижени сме поради опасноста договорот постигнат во 2015 година да пропадне под притисок на санкциите кои САД ги воведе и одлуките на Иран да не применува никакви обврски од договорот“, стои во заедничкото соопштение.

Се додава дека три земји се длабоко загрижени поради неодамнешните случувања во Заливот и влошувањето на безбедносната ситуација во тој регион.

„Веруваме дека дојде момент да го разбереме делувањето и пронаоѓањето на начин за спречување на ескалација на тензиите и враќање кон дијалогот“, се додава во соопштението.

Меѓународната агенција за атомска енергија потврди дека Иран на 8 јули започнал да го збогатува ураниумот над дозволеното ограничување од 3,67 отсто.