Ново жариште на коронавирусот во Иран: Бројот на заразени зголемен заради една свадба
Една свадбена прослава допринесе појава на ново жариште на коронавирусот во Иран, но државата мора да продолжи со отворање на економијата и покрај предупредувањата на можен втор бран, изјави денеска иранскиот претседател Хасан Рохани.
Во Иран последниве денови е пријавен раст на бројот на новозаразени.
– На една локација видовме врв на епидемијата. Се работи за свадба што предизвика проблеми за многу луѓе, здравствени работници и претставува економски загуби, како и загуба за здравствениот систем, рекол Рохани.
Тој не прецизирал кога или каде била свадбата.
Иранските универзитети денеска се повторно отворени по повеќе од три и пол месеци, рекол Рохани и додал дека за седум дена ќе бидат отворени градинките.
Во Иран досега се заразени повеќе од 167.000 лица, а повеќе од 8.000 починале.
Властите предупредуваат на втор бран на епидемијата, но велат дека причината за новите жариште е зголеменото тестирање.
Еден функционер рекол дека околу 70 отсто од новите случаи во Техеран се однесуваат на лица кои неодамна патувале надвор од Техеран.
– Во овие околности немаме друг избор, мораме да работиме. Нашите фабрики мораат да работат, продавниците да бидат отворени и движењето мора да се дозволи и овозможи, рекол Рохани.
Иранскиот претседател изјавил дека не се гледа крајот на пандемијата на коронавирусот во земјата и ги предупредил луѓето дека таа можеби уште долго ќе трае.
Иран од средината на април почна постепено да ги олеснува рестриктивните мерки на карантинот, но претходните неколку дена забележан е пораст на бројот на заразени на дневно ниво, а само во четвртокот се пријавени 3.574 случаи, најмногу од февруари оваа година.