Нестле ќе прави супи, зачини и инстант храна во Украина
Швајцарскиот прехранбен конгломерат Нестле најави инвестиција од 40 милиони швајцарски франци во отворање на нов производствен капацитет во западна Украина. „Нестле“ е една од ретките меѓународни компании што најавија нови инвестиции во Украина по почетокот на руската инвазија во февруари оваа година, забележува Ројтерс, пренесува Хина.
„Ова е важен потег за Нестле, направен во многу предизвикувачки период за Украина“, рече извршниот директор на Нестле за Југоисточна Европа, Алесандро Занели.
„Нашата цел е да формираме центар за храна и кулинарство, да обезбедиме нови работни места и да ги задоволиме потребите на Украинците и на сите европски граѓани со висококвалитетни производи“, рече Занели.
Руската инвазија сериозно ја потресе украинската економија, која, според проценките на Меѓународниот монетарен фонд, се очекува да падне за 35 отсто оваа година. Нестле веќе има околу 5.800 вработени во Украина и планира да отвори 1.500 нови работни места во новиот производствен капацитет во Смолихив, регионот Волин.
Новата фабрика е наменета за зголемување на производството на ладни сосови, зачини, супи и инстант храна, кои би се снабдувале на домашниот и европскиот пазар.