Необична изложба со репродукции на дела од Едвард Лир ќе биде поставена во „Куќата на Робевци“ во Охрид
Интересна и необична изложба е планирано да биде отворена на 24 септември во „Куќата на Робевци“ во Охрид. Станува збор за изложбата со наслов „Македонија низ очите, перото и четката на Едвард Лир, 17-24 септември 1848“, која ја поставува Милчо Георгиевски од охридскиот Музеј во соработка и со поддршка од „Лексикон на странски сликари, 1850-1950“.
Во долгогодишната конзерваторска работа на Милчо Георгиевски се вбројуваат повеќе значајни проекти за промоција на македонските култура и уметност. Својата кариера ја започнал во конзерваторскиот проект на црквата „Света Софија“, потоа учествувал во организирањето на изложбата на Охридски икони во Утрехт во 2011, како и на изложбата на охридска резба во Рим во 2016 година. Милчо е експерт и автор и на повеќе книги за македонските икони.
„Лексикон на странски сликари“ е иницијатива која ги следи трагите и откупува дела од странски уметници за кои Македонија била инспирација и муза во периодот 1850-1950.
Во однос на авторот чии дела ќе бидат изложени, Едвард Лир (1812-1888) историските факти укажуваат дека бил со несекојдневен карактер. Лир бил едно од 21 дете во неговата фамилија. Бил одгледан од својата постара сестра Ана. Уште од 6-годишна возраст страдал од епилепсија и имал проблеми со видот. Бил врвен мајстор на акварелна техника. Најпрво цртал животни, но во 1840-тите години започнал да патува низ Италија, Малта, Грција, Египет, Индија и Цејлон.
Во Македонија дошол од Грција и престојувал во периодот од 17 до 24 септември 1848 година во Охрид и Битола, а потоа продолжил во Албанија. Во својот еднонеделен претстој нацртал поголем број скици и акварели, кои ќе бидат репродуцирани и изложени на изложбата во „Куќата на Робевци“.
Покрај сликарството, Едвард Лир бил и писател на т.н. нонсенс поезија и проза, компонирал музика и свирел пијано, хармоника, гитара и флејта. Бил огромен обожавател на поезијата на Лордот Тенисон и неговите композиции биле инспирирани од Тенисоновите поеми.
(Текстот е објавен во „Културен печат“ број 97, во печатеното издание на весникот „Слободен печат“ на 18-19 септември 2021)