Нема да има тенис годинава
Тениската сезона е одложена до 8. јуни поради пандемијата на коронавирусот, но се поизвесно е дека нема да има повеќе тенис во 2020 година. Директорот на Австралија Опен, Крег Тили е првиот кој јавно излезе со ваков став.
– Мислам дека тенисот нема да се врати во 2020 година. Ќе биде тешко да се врати оваа година според тоа што го знам и што го слушам. Се подготвуваме за најлошото, а се надеваме на најдоброто – изјави Тили за медиумите во Австралија.
Тој својот став го објасни со тоа што пандемијата на коронавирусот не стивнува, не се знае до кога ќе биде ваква состојбата и доколку тенисерите добијат зелено светло за настап, тие ќе мора да патуваат низ целиот свет што е навистина тешко во ваква ситуација.
– Фактите и податоците не се охрабрувачки. Беше започнавме со подготовките за Австралија Опен за идната година, но дотогаш мора да се завршат многу работи. Календарот веќе трпи измени и тоа создава главоболки, а замислете како би било кога и останатите големи турнири ќе го следат примерот на Ролан Гарос и ќе ги презакажат за друг термин. Сите сакаме да има тенис, но според сегашните податоци мислам дека сезоната во 2020 година е завршена – заклучи Тили.