Голем број реки ширум Британија се излеаја од коритата по обилните дождови што ја натераа владата да издаде повеќе од 300 предупредувања за поплави, а туристичките оператори објавија сериозно нарушување, при што досега се оштетени околу илјада домови. Серијата бури во последните недели значеше долготрајни врнежи од дожд кои почнаа да паѓаат на заситена земја вчера и брзо предизвикаа веќе надојдените реки да се излеат од коритата низ Англија и Велс.

Невремето во последните денови предизвика поплави и во други делови на Европа. Реката Трент во централна Англија се излеа од коритата, загрозувајќи го населението. Лондонската противпожарна служба синоќа соопшти дека морала да придружува околу 50 луѓе на безбедно, откако канал се излеа во источниот дел на главниот град.

„Се разбудивме, како што многу луѓе ќе видат, во многу влажна ситуација низ целата земја“, изјави за Би-Би-Си Керолин Даглас, директор за управување со поплави во Агенцијата за животна средина.

Даглас рече дека досега се поплавени околу илјада домови. Од британската железница соопштија дека некои од нејзините линии на југот на земјата се во прекин. Патиштата беа затворени и во најтешко погодените области. За денеска се предвидуваат пообилни врнежи од дожд, иако не со ист интензитет како во текот на ноќта, а потоа се очекува посуво време.