Неколку деца во Франција се отруле од замрзната пица на „Нестле“, едно дете починало
Неколку деца во Франција завршија во болница, а едно почина откако јаделе замрзната пица „Fraîch’Up“, произведена во париската фабрика Нестле, пишува Ле Монд. Децата биле заразени со ешерихија коли, покажале прелиминарните анализи.
Овие трагични настани оставија неколку скршени семејства во Франција. Осумгодишно момче во Париз почина од хемолитичко-уремичен синдром, а 12-годишно девојче завршило во вегетативна состојба. Срцето на едно 7-годишно момче застанало неколку пати, додека членовите на едно семејство се во критична состојба.
Уште на крајот на јануари во болница завршиле три деца кои се уште имаат здравствени последици бидејќи ја изеле пицата. Ле Монд пишува дека овој случај го истражувала француската агенција за јавно здравје заедно со Институтот Пастер. Потврдија дека за труењето е виновна замрзнатата пица.
Покрај ова, тие потврдиле 53 случаи на труење и два смртни случаи кај деца, а се истражуваат уште 26 потенцијални случаи. Се смета дека овие случаи би можеле да бидат поврзани и со консумирање на оваа замрзната пица.
Во јануари децата завршија во болница, производството прекинало дури во март
Многумина сметаат дека на француските власти им требало премногу време да реагираат.
Пјер Дебисон, адвокат на едно од семејствата погодени од ваквите случаи, вели дека првите хоспитализации се случиле во јануари, а дури на 18 март било прекинато производството во фабриката.
„Тие дозволија производите да се продаваат и отруја повеќе деца“, коментира адвокатот. Нестле засега не ја коментира ситуацијата со пицата и труењето.