Многу родители поминуваат непроспиени ноќи обидувајќи се да го смират расплаканото, неутешно бебе. Во раните утрински часови се тетерават во кревет откако конечно успеале да го смират своето дете, а научниците тврдат дека решението за мирна ноќ цело време им било пред нос.

Спровеле серија експерименти за да откријат која техника на заспивање е најдобра.

Научниците ги снимиле родителите како ги галат своите бебиња, ги носат наоколу, ги лулаат во количката и ги ставаат во кревет, што им помогнало да утврдат кој метод е најдобар. Студијата, објавена во списанието „Тековна биологија“, објаснува како родителите би требало да го извадат своето расплакано бебе од креветчето, да одат со него пет минути по рамна површина, без нагло застанување или нагла промена на насоката, а потоа да седнат и да го држат бебето пет до осум минути пред да го стават во кревет.

– Неутешното плачење, особено ноќе, се покажа како главен извор на родителски стрес – изјави д-р Куми Курода од Центарот за наука за мозокот Рикен во Саитама, Јапонија.

– Овој метод кој трае околу 15 минути треба да се испроба пред да почнете сериозно да се грижите за тоа што не е во ред со бебето – рекол тој.

За подобро сфаќање на проблемот им помогнало проучувањето на алтрицијалните организми, т.е. на оние при раѓањето кои се беспомошни и бараат нега од родителите – како што се мачките, кучињата, глувците, верверичките и особено луѓето. Студијата покажала дека младенчињата стануваат попослушни кога ги носи нивната мајка, што е ефект што се нарекува преносен одговор.

Научниците користеле видеозаписи и податоци за отчукувањата на срцето за да рангираат четири различни пристапи за смирување на расплаканите бебиња: држење на бебињата додека седат, ставање во креветче, држење на бебињата во од или нишање во количка и слично. Плачењето се намалувало само кога бебињата биле во движење, без разлика дали мајките ги нишале или ги носеле. Седењето тивко со бебето или ставањето во креветчето не ги спречи солзите.

По пет минути носење, сите расплакани бебиња се смириле, а половината заспале, се наведува во извештајот. Но, опасноста не поминала, дури и за оние родители чии бебиња се смириле. Третина од бебињата повторно се разбудиле речиси веднаш штом родителите ги вратиле во кревет.

За да откријат што ги разбудило доенчињата, научниците ги проучувале отчукувањата на срцето. Податоците покажале дека отчукувањата на срцето на бебињата понекогаш се зголемувал и ги будел бебињата кога бил прекинат физичкиот контакт со родителот.

Обидот да се врати бебето во кревет на понежен начин немало ефект. Но, помогнало да се седи со бебето што спие пет до осум минути по шетањето со доенчето за тоа да потоне во подлабока фаза на спиење.

Иако овој пристап функционира подобро од другите, научниците велат дека родителите не треба да мислат дека ова е магично стапче кое ќе ги реши нивните проблеми.

Студијата спроведена во Италија и Јапонија, во која учествувале 21 бебе, е од истражувачка природа, а резултатите треба дополнително да се утврдат во пообемни студии.

– Бебињата лошо спијат ноќе од различни причини. Ако бебето го боли стомакот, мислам дека ова нема многу да помогне. Многу родители и понатаму ќе имаат непроспиени ноќи – порачал Џанлука Еспосито, професор по развојна психологија и коавтор на студијата на Универзитетот во Тренто.