Најстариот американски ветеран од Втората светска војна го прослави 112-от роденден
Најстариот американски ветеран од Втората светска војна, Лоренс Брукс на 12 септември го прослави 112-от роденден.
Роденденот го прославил во својот дом во Њу Орлеанс, а по тој повод забавата му ја приредил Националниот музеј за Втората светска војна. Гувернерот на сојузната држава Луизијана, Џон Бел Едвардс му го честитал роденденот.
„Господине Брукс, целата држава Луизијана ви е благодарна за она што го постигнавте и ви посакуваме да уживате во вашиот роденден“, му порачал Едвардс.
Брукс е роден во 1909 година во Норвуд, Луизијана, а во Њу Орлеанс живее од 1929 година. Тој бил регрутиран во 1940 и служел во 91-от инженерски баталјон. Тоа било случај сѐ додека не бил испратен во Нова Гвинеја и Филипините, каде ја градел инфраструктурата како мостови, улици и аеродромски патеки.
Во една прилика раскажал што се случувало кога се наоѓал во авионот Ц-47, со која била доставувана бодликава жица, во моментот кога му откажал моторот. Жицата ја исфрлиле од авионот за да го направат полесен. На пилотот и копилотот, кои единствени имале падобрани, им рекол дека ќе се држи за едниот од нив ако бидат принудени да скокнат од авионот
Како што рекол, сепак успеале и потоа се смееле за тоа што се случувало, пренесува АП.