Најистакнатите британски музичари бараат 50% од приходите од стриминг платформите
Повеќе од 150 најистакнати британски музичари се потпишале во писмото кое Британскиот сојуз на музичари го испрати до премиерот Борис Џонсон со кое се бара итно решавање на односите при распределбата на приходите од стриминг платформите.
Писмото доаѓа како дел од т.н. „The Brokenrecords Campaign“ како дел од парламентарното утврдување на односите што владеат во музичката индустрија.
Писмото до британскиот премиер го потпишаа, меѓу другите, Пол Макартни, сите живи членови на групата Лед Зепелин, Ени Ленокс, Питер Габриел, Роберт Фрип, Роберт Смит, Марк Нопфлер, Крис Риа, Масив Атак и Кемикал Брадерс, Ноел Галагер, Крис Мартин, Лили Ален, Селест, Роџер Далтри, Палома Фејт.
Писмото има дополнителна тежина затоа што е потпишано и од музичари со долгогодишна кариера, но исто така и од млади и успешни луѓе кои се соочуваат со неправдите во светот на музиката.
Потпишаните музичари во писмото до британскиот премиер велат дека предолго, стриминг платформите, издавачките куќи и другите интернет гиганти ги искористувале изведувачите и креаторите без фер компензација.
„Стримингот брзо го заменува радиото како главно средство за музичка комуникација. Сепак, законските решенија не одат во чекор со технолошките промени и, како резултат, изведувачите и авторите не уживаат соодветна заштита како со радио-емитувањето“, предупредуваат тие.
За да се поправи ова, потребно е, велат британските музичари, да се променат само два збора од Законот за авторски права од 1988 година.
Итната владина интервенција за регулирање на конкуренцијата е првиот чекор кон регулирање на овие односи, велат тие, истакнувајќи дека музичарите генерираат 50% од своите приходи од радио станиците, но само 15% од стриминг сервисите.