МЗТ Скопје одличната форма ја потврди и во дерби пресметката со Блокотехна, победувајќи со 90:75. Ова беше 10. триумф во серија со кој останаа на првото место на табелата во Суперлигата и за задржаа предноста пред Работнички од две победи.

„Металците“ беа подобар тим во сите аспекти од играта, доминираа во скокот (28:42) и имаа подобар процент на шут од игра (43% – 56%). Таквата доминација вроди со плод во второто полувреме, за прв пат дојдоа до двоцифрена предност (58:69), за во последната четвртина со серијата од 14:2 да ја заверат победата над тимот на Блокотехна.

Џејмс Вудард со 22 поени и 12 скокови беше прво име кај МЗТ Скопје, а одлична партија прикажаа уште и Иве Иванов со 17 поени и Предраг Самарџиски со 16 постигнати поени.
Во редовите на Блокотехна се истакна Кенет Фунденбурд со 23 постигнати поени.