Кошаркарите на МЗТ Скопје Аеродром на најдобар можен начин ја завршија натгпреварувачката 2019 година, со триумф пред своите гледачи. „Металците“ во рамките на 13. коло од АБА2 лигата со 73:64 го совладаа босанскиот претставник Спарс.

До седмата победа во низа со која го задржаа второто место на табелата (10-3) кошаркарите на МЗТ Скопје дојдоа потешко од очекувањата иако играат против последнопласираниот тим во лигата.

Гостинските кошаркари одлично го започнаа натпреварот и првата четвртина ја решија во својата корист со 23:14, иако до последната минута од првиот дел имаат и плус 13 (23:10). Одговорот на МЗТ Скопје беше фантастичен, со серија од дури 21:2 ја презедоа контролата врз резултатот и предноста ја одржуваа до последниот свиреж.

Дамјан Стојановски со 17 поени беше најпрецизен кај МЗТ Скопје, додека Марин Морнар постигна 16 поени и 6 скока, а Ѓорѓе Милошевиќ даде 16 поени и 8 скока

За кошаркарите на МЗТ Скопје нема да има преголем одмор бидејќи следниот натпревар го имаат веќе на 2 јануари идната година кога и гостуваат на Рогашка.