Крајна цел на протестите е оваа власт, која не нуди ништо и ја води државата во амбис, што побрзо да падне. И во ваква ситуација немаме ни минута повеќе, истакна претседателот на ВМРО-ДПМНЕ, Христијан Мицкоски во емисијата „Само интервју“ на телевизија Канал 5.

Еден од легитимните начини, според него, се протести на улица, вториот начин е парламентот.

– Таму во парламентот колку што може да видите, ВМРО-ДПМНЕ, а и другите опозициски партии едвај се борат за збор. Ќе имаме многу предлози, еве да најавам ексклузивно ќе имаме надзорна расправа не само за струјата, туку и за Еуростандард банка, потоа за злоупотреба на европските фондови, како случаите со берберницата, за тренинг на магариња“, посочи Мицкоски.

Претседателот на ВМРО-ДПМНЕ се осврна и на фактот дека конкретно за струјата покачувањето ќе биде и поголемо.

– Власта нè уверува дека имаме најниска цена во регионот. Тоа не е точно затоа што ако ја споредите во киловат час што ја плаќаат македонските граѓани визави просечната плата во државата сме во топ три држави во Европа. ВМРО-ДПМНЕ има капацитет да понуди подобро општество отколку ова што денеска е реалност, истакна Мицкоски.