Вечерва Аргентина славеше победа против Мексико од 2:0 со која остана во игра за пласман во осминафиналето.

И во оваа победа на „Гаучосите“ голема улога одигра Лионел Меси кој го постигна првиот гол. Меси со мала мајсторија по додавањето од Ди Марија во 61. минута го отвори резултатот. Во финишот од средбата Енцо Фернандез само го потврди триумфот.

По натпреварот Меси порача дека на секој натпревар Аргентинците гледаат како на финале.

„Не се предавме. Немаме право на грешка и секој натпревар за нас е финале. Сепак, мислам дека сме обединети како група и веруваме дека можеме многу заедно. Првиот натпревар многу не чинеше, но влијае многу фактори. Тоа е сега зад нас, знаевме дека вечерва мораме да победиме“, изјави Меси по натпреварот.

Во последното коло Аргентина ќе игра против Полска и со победа во тој натпревар Аргентинците сигурно продолжуваат во осминафиналето.