Аргентинецот се наоѓа во последната година од договорот и можно е да одлучи да ја реализира летната желба и да си замине од Барселона, но најверојатно негова следна дестинација нема да биде Манчестер сити.

Меси од јануари ќе има право да преговара со заинтересираните екипи, а медиумите во Шпанија и Англија шпекулираа дека „граѓаните“ ќе тргнат во зимска офанзива во Аргентинецот. Но, последните вести велат дека Манчестер сити планира да се повлече од трката по неговиот потпис.

– Имам информација од личност со голем авторитет, некој кој добро ги знае состојбите и тврди дека Манчестер сити нема ни да се обиде да направи трансфер на Меси. Според информациите кои ги имам, вратата на Сити за Меси од денеска е затворена и тоа поради две причини, годините и финансиите.
Меси се приближува кон годините кога неговите игри ќе одат во надолна линија, тој повеќе не е оној играч што доминираше во Барселона и на фудбалските терени. Поради тоа во Сити размислуваат дека не е многу паметно да се донесе фудбалер со астрономска плата. Меси заработува околу 100 милиони евра бруто и таа сума е огромна за речиси сите екипи – вели Семра Хунтер, шпански фудбалски експерт.

Доколку навистина Манчестер сити се откаже од трансфер на Меси, за Аргентинецот остануваат две опции, едната е да почека до претседателските избори во Барселона (24. јануари 2021 година) и да потпише нов договор или да се пресели во Серија А, поточно во Интер кој беше сериозно загреан за него за време на летниот преоден рок.