Македонија броеше до 51 за прва победа на ЕХФ шампионатот во Варна
После ремито на стартот против Украина (23:23), денеска на ЕХФ шампионатот во Варна (Бугарија) за играчите до 20 години македонската репрезентација триумфираше убеливо над Косово со 51:29.
Со почетната серија од 5:0 Македонија најави дека атакува на триумфот, во првиот дел непосредно пред паузата беше стекната најголемата позитива од „плус 10“ (21:11).
Во второто полувреме само се зголемуваше разликата, највисоката беше „плус 24“ (49:25, 50:26).
Најефикасен во победничките редови беше Ненад Белистојаноски со 10 голови, следен од Димитар Узунчев кој имаше осум, а на спротивната страна Јон Вокши запиша девет погодици, два помалку Ардин Бериша.
Во некомплетното второ коло од групата „Б2“ нашата селекција е на првото место со три бодови, пред Романија и Швајцарија со по два, еден има Украина, а без бодови е Косово.
Следниот трет меч ракометарите предводени од селекторот Бранислав Ангеловски ќе го имаат на 20 јули против романската репрезентација од 14.00 часот.