Фудбалерите на Ватфорд направија големо изненадување во 28. коло во англиската Премиер лига откако на домашен терен го совладаа Ливерпул со дури 3:0.

Редси така останаа без можноста да го освојат „Златниот пехар“, трофејот наменет за освојувачот на Премиер лигата кој сезоната ја завршува без пораз.

После 422 дена и 45 натпревари, ова е првиот лигашки пораз на Ливерпул.

Немаше голови после првото полувреме, но затоа во второто домаќините се надминаа и успеаја преку Сари, двоен стрелец, и Дини да ги освојат трите бода, важни во борбата за опстанок.

„Црвените“ предводени од Клоп и покрај овој пораз убедливо водат и натаму на првото место со 79 бодови, 22 повеќе од второпласираниот Манчестер сити.

Во останатите средби од саботната програма: Брајтон-Кристал Палас 0:1, Борнмут-Челзи 2:2, Њукасл-Барнли 0:0, Вест Хем-Саутемптон 3:1.

Дуелот Астон Вила-Шефилд јунајтед е одложен поради настапот на тимот од Вила Парк во финалето в недела во Лига купот против Манчестер сити.