Кремљ се пофали со „значителниот напредок во демилитаризацијата на Украина“
Кремљ денеска објави дека Русија „постигна значителен напредок кон демилитаризација на Украина“, што беше една од првичните цели на руската инвазија, која започна пред 10 месеци.
Дмитриј Песков, портпаролот на рускиот претседател, денеска беше прашан од новинарите за изјавата на Путин според која „украинскиот воено-индустриски комплекс, ако веќе не е сведен на нула, оди во таа насока“.
„Може да се каже дека постигнавме значителен напредок кон демилитаризација на Украина“, рече Песков.
Путин вчера изјави и дека „сите вооружени конфликти завршуваат со преговори“, што имплицираше дека порано или подоцна Украина ќе биде принудена да и предаде дел од својата територија на Русија за конечно да заврши војната.