Ковачевски-Вучиќ: Македонија и Србија взаемно се поддржуваат за клучните прашања и предизвици

Српскиот претседател Александар Вучиќ и македонскиот премиер Димитар Ковачевски утрово на средбата во Белград го потврдија долгогодишното партнерство и пријателство меѓу Македонија и Србија отсликано преку постојаната взаемна поддршка за клучни прашања и предизвици кои ги засегаат двете земји.

Како што соопшти владината прес-служба, на средбата било заклучено дека билатералните односи меѓу двете земји се карактеризираат со динамичен политички дијалог на високо ниво, економска соработка и трговска размена.

„На средбата беше разговарано за регионалните иницијативи кои се можност за перспективи и уште поголемо унапредување на меѓусебната соработка. Целта на Отворен Балкан и Берлинскиот процес е регионален развој и побрза интеграција на единствениот европски пазар и во Европската Унија“, се наведува во соопштението.

Соговорниците разговарале и за политиката на проширување на Европската Унија со земјите од Западен Балкан и за динамиката на пристапните преговори на Северна Македонија и Србија. Притоа биле нагласени реформските процеси во повеќе клучни области, градење на институционални капацитети како и развојните стратегии кои ги спроведуваат владите на двете земји.

Исто така, на средбата биле споделени и информации за делувањето на двете држави во рамки на Западен Балкан, во контекст на економската, демократска и безбедносната ситуација во регионот и Европа.

Во владината делегација која што ја предводи Ковачевски се и министрите за внатрешни работи Оливер Спасовски, за економија Крешник Бектеши, за транспорт и врски Благој Бочварски како и заменик министерот за информатичко општество и јавна администрација Александар Бајдевски.

Посетата започна вчера попладне, а по пристигнувањето во Белград, Ковачевски, како што објави на Фејсбук, се прошетал со Вучиќ и со премиерката Брнабиќ на кејот на Сава.

ФОТО: Ковачевски стигна во Белград, со Вучиќ и Брнабиќ се прошетаа покрај Сава

 

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот