Маж (32) од Косово е уапсен во Виена заради сомневање дека до смрт ја претепал својата сопруга (32). Лисиците на рацете му биле ставени откако тој самиот влегол во полициската станица и се пријавил.

Службениците во полициската станица во Виена останале шокирани кога мажот влегол, раскажал дека ја претепал својата сопруга и дека веројатно ја убил. Полицијата веднаш отишла во станот во кој живеел брачниот пар и го затекнале безживотното тело на жената.

Австриските медиуми пренесуваат дека воочиле страшни повреди на главата, посебно на тилот, а дека докторите на итната помош можеле само да констатираат смрт.

Причината за ваквото брутално убиство засега не е целосно јасна, но мажот раскажал дека бил многу љубоморен. Во станот бил пронајден и дрвен стап, за кој се претпоставува дека бил користен како оружје.

Тамошните портали исто така пишуваат дека фамилијата потекнува од Косово, имала и три деца, но за среќа ниту едно од нив не било во станот кога било извршено злосторството. Неофицијални информации велат дека во полициската евиденција за ова лице до сега немало пријави за насилство.