МЗТ Скопје со големата победа на гости кај Задар се најде пред експресно враќање во АБА лигата. Тренерот Ѓорѓи Кочов е задоволен од прикажаната игра и остварениот триумф.

–  Би сакал да им честитам на моите кошаркари за играта и за борбеноста. Во последно време игравме во НБА ритам и немавме многу време да се подготвиме за Задар, но сѐ што се договоривме играчите максимално го испочитуваа тоа. Денеска бевме подобар противник, го искористивме притисокот кај кошаркарите на Задар и заслужено победивме. Во финишот непотребно влеговме во неизвесна завршница и тоа е нешто што ни се случувало и претходно, а треба да го искорениме во иднина. Во вторник ќе пробаме да победиме и на домашен терен и да си ја оствариме најголемата желба сезонава, да се вратиме во АБА-лигата – изјави Кочов.