МЗТ Скопје со една нога во АБА лигата
Екипата на МЗТ Скопје се наоѓа пред пласман во АБА лигата откако како гости го совлада Задар со 89:83 во бараж двомечот за последното место во регионалната лига. Во серијата која се игра до две победи, кошаркарите на МЗТ Скопје, во Задар го одиграа најдобриот натпревар во последниот период, и во вторник со нова победа, овој пат пред своите гледачи ќе обезбедат експресно враќање во АБА лигата.
„Металците“ одлично го отворија резултатот и многу брзо дојдоа до двоцифрена предност (17:5 во 4. минута) но не застанаа тука. Одличната игра на избраниците на Ѓорши Кочов во 15. минута им донесе и предност од дури 21 поен (47:26) и до крајот на натпреварот умешно ја одржуваа предноста. Во последните моменти, домашните кошаркари со серија тројки се обидоа да направат пресврт но немаа сили за изненадување.
Андреја Бојиќ со 24 поени и 8 скокови беше најдобар во тимот на МЗТ Скопје, а одлична партија прикажаа уште и Џејмс Вудард со 22 и Иве Иванов со 19 постигнати поени.
Наредниот натпревар од серијата до две победи се игра наредниот вторник во Скопје.