Министерството за здравство на Кипар воведува највисоки цени за тестовите за Ковид-19, односно молекуларните (ПЦР) не смеат да бидат над 55 евра, а плафонот за брзите тестови е 25 евра.

Одлуката стапува во сила од денеска, а во цената не е вклучен ДДВ.

Од Министерството потенцираат дека тестирањата со брзите тестовите ги вршат само здравствени работници, а процесот на земање примероци е опасен и дека „брзите тестови не се наменети за самотестирање“.

Додаваат дека позитивните резултати од брзите тестови се проверуваат со молекуларен метод пред да бидат вклучени во потврдени случаи на Ковид-19.

Плафон за цените на тестовите ќе воведе и Грција, како што беше соопштено минатата седмица, со цел да се спречи профитерство.

Во Грција цените се пониски отколку на Кипар, па молекуларниот ПЦР тест не смее да биде поскап од 40, а највисоката цена за брзиот тест е 10 евра.