Катарските власти 30 часа држеа во притвор норвешки новинари кои известуваа за кршење на човековите права
Двајца новинари на норвешката телевизија НРК денеска пристигнаа дома откако во Катар беа притворени на 30 часа бидејќи известуваа за проблемите на работниците мигранти во државата домаќин на Светското првенство во фудбал.
Халвор Екеланд и Локман Горбани беа во Катар кој во неделата одбележа една година од почетокот на Мундијалот кој ќе се игра од 21 ноември до 18 декември идната година.
Катар се наоѓа под голем меѓународен притисок поради лошиот третман кој го имаат работниците што работат на изградба на стадионите, а организациите за човекови права бараат реформи во оваа држава богата со нафта.
Двајцата норвешки новинари беа уапсени во понеделникот наутро додека известуваа во живо од мигрантски камп, а полицијата притоа ги избришала снимките од нивната опрема.
Катарската влада ги обвини за „упад во приватна сопственост и снимање без дозвола“, притоа потенцирајќи дека анонимниот сопственик повикал полиција.
Норвешкиот премиер Јонас Гар Стоере веднаш реагираше на веста и преку Твитер порача дека апсењата не „неприфатливи“.
„Слободните медиуми се клучни во функционалната демократија. Уште еден доказ за тоа е доделувањето Нобеловата награда за мир на новинарите. Среќен сум што Халвор Екеланд и Локман Горбани се ослободени“, напиша премиерот Стоере.
Осуда за апсењето на новинарите дојде и од фудбалската федерација на Норвешка и новинарскиот синдикат на оваа скандинавска држава.
-Убаво е повторно да се биде дома во Норвешка. Тоа беше голем предизвик, но знаевме дека многу луѓе работеа за нашето ослободување – изјави Екеланд.