Поранешниот претседател на Јувентус, Џовани Кобили Џиџи ја советуваше актуелната управа на клубот да се ослободи од Кристијано Роналдо што побрзо.
Кристијано Роналдо и на 36 години продолжува да ги тресе мрежите, на Порртугалецот му недостасуваат осум голови за да дојде до бројката од 100 во дресот на Јувентус, но тоа не е доволно за „старата дама“. Јувентус втора година по ред е елиминиран во осминафиналето од ЛШ и поради тоа управата планира ремонт на екипата бидејќи експериментот со Роналдо не успеа.
– Дали ангажирањето на Кристијано Роналдо беше грешка? Апсолутно да – изјави поранешниот претседател на Јувентус, Џовани Коболи за Радио Пуно Нуово.

Тој смета дека има респект за се што направил Роналдо во кариерата, но едноставно смета оти Португалецот претставува голем трошок за Јувентус.
– Тоа го реков уште на почетокот. Имам голем респект кон вистинскиот шампион, но тој е прескап. Јувентус мора да донесе одлука дали ќе го продаде или не, но треба да се каже дека тој ја чини екипата речиси милион евра по постигнат гол. Претседателот Ањели можеби е самокритичен, но нема поддршка. Јувентус мора да направи ремонт на екипата и затоа би му дал отказ на Роналдо, но и на Паратичи – вели Коболи.