Амбасадорот на Јапонија, Савада Хиронори денеска ја посети Општата болница со проширена дејност во Кочани, за чиешто гинеколошко одделение е донирана опрема вредна близу 48 илјади евра, како дел од јапонската GGP-програма на мали грантови за основни потреби и човекова безбедност.

Обезбеден е дигитален ехо апарат со фетален монитор за ултразвучно и детално набљудување на срцевиот ритам, што овозможува висококвалитетна медицинска услуга и брза дијагноза за пациентите.

Драго ми е што овие апарати носат поквалитетни здравствени услови и безбедност за жените, идните мајки во Кочани, но и во целиот источен регион, при следењето на нивната бременост. Јапонскиот народ е горд и среќен што му помага на македонскиот народ, а од 1996 година поддржуваме проекти во здравствениот сектор, образованието и животната средина и досегашната јапонска помош изнесува 5,8 милиони евра за 171 GGP-проект. Во рамки на иницијативата на Западен Балкан, Јапонија е силно посветена да ја поддржи Северна Македонија во социјалниот и економскиот развој, што е многу важно за интеграцијата во ЕУ, истакна амбасадорот Савада Хиронори.

Директорот на Општата болница, Александар Серафимов се заблагодари на поддршката и нагласи дека јапонската техничка помош значително ќе помогне во следењето на здравствената состојба на женската популација во регионот.

Просечно годишно на одделот за гинекологија имаме над 6,8 илјади прегледи, а кај скоро половина од тој број се користи фетален монитор и современа опрема за дијагностика. Наши пациентки се идни мајки не само од Кочани, туку и од соседните општини Виница, Берово, Делчево и останатите, истакна Серафимов.

Благодарност за донацијата од името на граѓаните на општина Кочани упати и градоначалникот Љупчо Папазов, со очекување успешната соработка со Амбасадата на Јапонија да продолжи и во наредниот период.