Јанша: Заострени мерки против ковид-19 како последица на ширење на лажни вести за ризиците од вирусот
Лажните вести со кои се негира опасноста од коронавирусот што во Европа се шират претежно преку социјалните мрежи, но, за жал и преку главните медиуми, ги принудуваат земјите на континентот да преземат поостри мерки отколку што е потребно, изјави словенечкиот премиер, Јанез Јанша денеска во Брисел.
Во пресрет на вториот ден од Самитот на Европската Унија (ЕУ), Јанша рече дека лидерите на земјите-членки многу разговарале за начините за борба против лажните вести во смисла на негирање на опасноста и негирање на самото постоење на вирусот, пренесува агенцијата СТА.
– Ова предизвикува голема штета на нашата заедничка борба против ширењето на коронавирусот на национално и на континентално ниво и принудува на преземање на поостри мерки отколку оние кои би биле доволни без лажни вести и масовно ширење на целосно ненаучни и нелогични негирања, истакна Јанша.