Нашиот познат музичар Владимир Четкар, кој веќе со години живее и работи во Њујорк од каде го освојува и светот, вели дека поради коронавирусот градот кој никогаш не спие, сега, во текот на вечерните часови е во длабок сон.

Со Четкар разговараме како е моментната ситуација во срцето на Њујорк, Менхетен, и како тој се справува сам со себе меѓу четирите ѕида.

Како помина пласманот на твојот трет студиски албум „Going Home“, и во кои земји е најприфатен? 

– Токму пред некоја недела „Going Home“ се издаде во Јужна Кореа преку музичката куќа C&L music која албумот го пласира на национално ниво со високотиражна физичка дистрибуција. C&L music е исклучително респектабилна корејска музичка куќа која е одговорна за издавањето на музичките каталози на ECM, JVC, King Records, Schema, Naïve и т.н. на јужно корејскиот пазар. Претходно албумот беше издаден преку музичката куќа „Пи Вајн“ во Јапонија каде што исто така доби високотиражна национална дистрибуција и беше еден од најпродаваните албуми во музичките продавници „Tower Records Japan“. Морам да напоменам дека Јапонија и Јужна Кореја се единствените земји во светот каде што сè уште успешно опстојуваат големите музички продавници и токму поради тоа таму има огромна конкуренција и селективност за пласман на музички продукт. Покрај овие две земји музиката од албумот „Going Home“ e одлично прифатена и има голема поддршка од повеќе национални и специјализирани радио станици во Америка, Аргентина, Унгарија, Италија, Тајланд, Индонезија, Англија, Шпанија, Австралија, Мексико, Бразил и т.н. Популарната радио емисија Дискорама од Аргентина, емитувана во повеќе земји во централна и Јужна Америка дури направи специјална емисија посветена на мене и за чии потреби ме интервјуираа лично во Њујорк.

Сега те наоѓам во Њујорк? Како е ситуацијата таму околу домашните изолации поради коронавирусот? Празни ли се улиците, се почитуваат ли правилата?

– Да, моментално сум во Њујорк каде ситуацијата е мошне сериозна бидејќи додека го пишувам ова интервју токму тука е најголемото жариште на оваа пандемија. Улиците се празни, сè е затворено, амбулантните сирени не стивнуваат, а кај луѓето се чувствува тензија, па дури и паника поради овој шокантен пресврт во нивните животи.  Ако сега се најдете во центарот на Менхетен ќе сфатите дека градот кој никогаш не спие моментално е во длабок сон.

Затворени ли се клубовите? Се префрлија ли веќе уметниците на Интернет? Што е најактуелно на „он лајн“ културната сцена? 

– Уметниците се максималмно активни на Интернет, па од неодамна почнаа да се организираат дури и онлајн фестивали, журки, музички работилници и т.н.

Бројот на заболени и починати од коронавирусот постојано се зголемува во САД, постои ли паника меѓу народот? Како генерално се гледа на новонастаната ситуација која бара ред ограничувања? 

– За жал, тука бројката на заболени и починати вртоглаво расте и постои чувство како работите да се вон контрола. Токму поради сè ова испаничениот народ ги празни продавниците до тој степен што  има сериозен недостаток на некои есенцијални продукти за хигиена и зајакнување на имунитетот. Луѓето се претежно дисциплинирани и внимателни, но со оглед на катастрофално високите бројки на заболени и преоптоварените болници, мислам дека тука уште многу поодамна требаше да се воведат поригорозни мерки за спречување на ширењето на вирусот Ковид-19.

Како ти го поминуваш своето време меѓу четирите ѕида? Дали ситуацијата делува на твојата креатвност?

– Се трудам да бидам оптимист и да го хранам позитивниот дух во мене. Карантинот ме затекна сам во Њујорк, токму пред започунувањето на мојата турнеја во среднозападна Америка. Вишокот на енергија го трошам со физичка активност, а истовремено се трудам да бидам што покреативен и работам на нови материјали кои ќе се најдат на еден од моите наредни студиски албуми.

Кои работи ти се први на листата на желби и обврски кои ќе ги направиш веднаш штом помине периодот на изолација?      

– Штом помине периодот на изолација едноставно сакам повторно да си ја почувствувам динамиката на мојот живот.Во секој случај, мислам дека сите од оваа ситуација ќе излеземе помудри и поискусни и ќе сфатиме дека вистинското богатство не е во парите, славата и престижот туку во слободата, едноставноста, во дишењето воздух со полни гради, вкусното  кафе или вино со семејството и пријателите и сите други едноставни секојдневни, но бескрајно скапоцени моменти.