Куќите и становите во Германија стануваат сè поскапи – како во урбаните области, така и во руралните. Ова се бројките кои ги објави денес Федералниот завод за статистика.

Во вториот квартал од годината, цените на недвижностите се зголемија во просек за 5,2 проценти во однос на истиот период лани. Особено силен е растот во седумте најголеми германски градови.

Во Берлин, Хамбург, Минхен, Келн, Франкфурт, Штутгарт и Дизелдорф, цените на куќите за една или две семејства се зголемија за 10% и становите за 8,6%.

Цените на недвижностите се зголемија и во помалку населените рурални области, при што цените на становите и куќите се зголемуваат во просек за 4,2 проценти.

Историски ниските каматни стапки доведоа до бум во побарувачката на имоти во Германија во последните години, што доведе до зголемување на цените.