Хрватскиот режисер Далибор Матаниќ (49) со години испраќал непримерни пораки и создавал непријатни ситуации за време на снимањето на филмовите, пишува хрватскиот медиум „Вечерњи лист“, кој разговарал со неговите наводни жртви, главно млади девојки.

Поради овој скандал, тој ги изгуби сите работни ангажмани, меѓу кои и голема европска серија и предизборен ангажман за политичка партија.

Тој им испраќал пораки со сексуална содржина на голем број жени, често оправдувајќи ги контактите со понуди за работа, по што ги убедувал да се префрлат на мобилната апликација Вибер.

„Сите имаме впечаток дека избирал помлади девојки, кои не знаат како да се позиционираат или се плашат да не останат без работа. Ова особено се однесува на младите актерки на кои им претстои кариера, а Матаниќ снима две серии годишно, филмови, спотови, реклами“, изјави една актерка за „Вечерњи лист“, а друга вели дека преед повеќе од две години често почнал да ја контактира со пораки, во секое време од денот или ноќта, упорно повикувајќи ја на „тајни бели забави“.

Матаниќ, кој кон крајот на минатата година јавно се пофали дека престанал да пие алкохол, почнал да вежба и се посветил на здрав живот, се огласи во петокот попладне на својот фејсбук-профил. За своето лошо однесување ја обвини злоупотребата на дрога и алкохол, а се пожали и на стресната работа. Тој откри дека се пријавил во болница за рехабилитација.

„Почитувани колешки и колеги, другарки и другари. Реално и виртуелно. Можеби сте забележале дека исчезнав од социјалните мрежи. Сепак, денеска се враќам само да ви ја раскажам мојата приказна, бидејќи деновиве има многу верзии, а јас би сакала да ја чуете мојата страна.

Повеќе од 20 години се трудам жените да го имаат неопходниот мир за актерска концентрација на снимањето и затоа повеќето актери сакаат да работат со мене затоа што не дозволувам никакво вознемирување. Дури знаев и да им дадам отказ на луѓето кои не го почитуваа мирот на актерките и другите соработници. Како што обично се случува, го знаев секој детал од кадарот што го снима, но лично не бев свесен за деталите од моето однесување…

Искрено и неизмерно жалам за моите несоодветни постапки, поради кои некои жени се чувствуваат вознемирени. Не бев свесен за мојот погрешен пристап кон колешките надвор од сетот. Нема оправдување за моите постапки. Познат сум по мојот специфичен, маркантен хумор и радикални методи на работа со кои се грижам актерите да бидат што поквалитетни во кадарот, но ништо не оправдува ако направите некој да се чувствува непријатно.

Дури сега, кога самостојно се пријавив во институција за лекување на зависности и работам со професионалци, сфатив дека несоодветно сум ги малтретирал колегите. Сè се случуваше кога бев под дејство на алкохол или дрога.

Работата ни е ужасно стресна, но секако тоа никако не ме оправдува.

Најпрво, би сакал да бидам пример за другите колеги во ова, тоа е многу чувствително поле во кое некои од нас очигледно не се снаоѓаат најдобро.

Веќе лично им се извинив на некои од жените и побарав прошка. Ќе продолжам да го правам тоа најскромно и со целосна почит за време на третманот.

Ги признавам моите погрешни постапки, но апелирам до медиумите да не ја дополнуваат приказната за заштита на моето семејство и дефинитивно да ја обработат и проверат приказната на адекватен начин и да не ја мешаат со други случаи. Моето семејство е хуманистички воспитувано, не знаеме да мразиме, не им држиме лутина на оние кои пред некој ден поради мои грешки не оставија без работа, си направивме нови убави другарки кои се спремни да помогне. Најважно во сето ова е што целосно сфатив дека тоа што го правам е неприфатливо, не бев свесен за тоа и не го сфатив правилно мојот став. Нема оправдување за грешките што ги направив, посветен сум да работам на себе за никогаш повеќе да не се повтори таквото однесување и постапки.

Подготвен сум да ги сносам последиците, да се соочам со проблемите што ги имам, но ги молам сите, особено медиумите, да внимаваат на моето семејство кое нема никаква врска со ова.

Направив многу уметнички достигнувања за оваа земја, но верувајте, во истата секунда би го променил сето тоа само за момент да бидам подобар сопруг, подобар татко и помалку да ги повредувам другите…

По оваа изјава целосно се повлекувам од јавноста и барам разбирање од сите, со оглед на тоа дека се лекувам токму поради проблемите што ги направив.

Би сакал да му се заблагодарам на моето семејство за сето она низ кои поминаа и на актерите за искрената поддршка“, напиша Матаниќ.