Хамилтон ита кон јубилеј, Британецот уште еднаш ја освои Португалија
Седумкратниот светски шампион, возачот на „Мерцедес“ Луис Хамилтон денеска триумфираше на трката за Големата награда на Португалија во рамките од Формула 1 шампионатот и така ја зголеми предноста во генералниот пласман.
Британецот на патеката „Алгарве“ ја забележа својата 97 победа во кариерата (уште три до јубилејната стотка), а втората оваа сезона во три одржани трки.
Второто место го освои членот на „Ред Бул“, Макс Ферстапен, а трет вториот пилот на „Мерцедес“, Валтери Ботас кој ја започна трката од пол позицијата. Воедно Финецот освои и додатен бод за најбрз круг во трката.
The moment @LewisHamilton took his second win of 2021! 🎉#PortugueseGP 🇵🇹 #F1 pic.twitter.com/wBl2oQauAb
— Formula 1 (@F1) May 2, 2021
Од четвртата до шестата позиција редоследно се најдоа Серхио Перес („Ред Бул“), Ландо Норис („Мекларен“) и Шарл Леклер („Ферари“). Првата десетка ја комплетираа дуото на „Алпин“, Естебан Окон и Фернандо Алонсо, Даниел Рикардо од „Мекларен“ и Пјер Гасли од редовите на „Алфа Таури“.
После три трки Хамилтон е првопласиран на табелата кај возачите со осум бодови повеќе од Ферстапен. Наредната трка во шампионатот ќе се вози наредната недела за ГН Шпанија.