Хамас ослободи руски државјанин од Газа
Хамас денеска објави дека ослободил заложник со руско државјанство од Газа и додаде дека потегот е направен затоа што Хамас ја цени позицијата на Москва за израелско-палестинското прашање. Хамас соопшти дека рускиот државјанин е предаден на Меѓународниот комитет на Црвениот крст.
Не е сосема јасно дали потегот има врска со договорот од петокот меѓу Израел и Хамас за четиридневен прекин на огнот и ослободување на заложниците и затворениците. Според условите на четиридневното примирје, Хамас треба да ослободи 50 заложници, а за возврат Израелците треба да ослободат 150 палестински затвореници, меѓу кои и жени и тинејџери, од нивните затвори.
Египет денеска доби список на Израелци и Палестинци чие ослободување беше планирано во текот на денот како дел од примирјето меѓу Хамас и Израел.
„Денеска египетските власти добија список со имиња на затвореници од Газа, меѓу кои има и 13 Израелци, како и список со имиња на Палестинци кои треба да бидат ослободени од израелските затвори, во кој има 39 од нив. Тие треба да бидат разменети денеска“ објави египетската државна информативна служба.
Ова е трета група која се разменува во согласност со договорот за прекин на огнот со посредство на Египет и Катар.