Грчките медиуми по посетата на Заев: Нова меѓувладина седница и договор за двојно оданочување меѓу двете земји
Грчките медиуми одвоија голем простор за посетата на македонскиот премиер Зоран Заев на Атина и средбите што ги имаше со државниот врв, но и со претставници на бизнис сектор. Агенцијата АНА-МПА излезе со наслов „Меѓувладина седница меѓу Грција и Северна Македонија, најави Заев” и во дел од текстот најавува потпишување на договор за избегнување на двојното оданочување, но и за интересот за наше учество во проектот за снабдување со течен природен гас кај грчкиот град Александруполи.
„Заев: Меѓувладина седница на Северна Македонија и Грција”; „Меѓувладина седница на Северна Македонија и Грција, најави Заев”; „Заев: Мицотакис сака да дојде во Скопје”, се дел од насловите во онлајн изданијата на грчките медиуми, во текстови главно преземени од АНА-МПА.
Онлајн изданието на весникот „Етнос”, акцентот го става на делот од интервјуто на Заев за МИА во кое вели дека Мицотакис изразил желба да го посети Скопје, а ја споменува и понудената подготвеност на Грција да ја снабди Северна Македонија со вакцина за Ковид-19.
Посетата на Заев на Атина и средбите со Мицотакис и претседателката Сакеларопулу предизвика интерес кај медиумите во Грција кои секојдневно информираа за разговорите со грчкиот државен врв, а македонскиот премиер за време на престојот во Грција даде интервјуа за грчката телевизија „Мега” и за весникот „Та неа”.