Српскиот најдобар тенисер Новак Ѓоковиќ важи за еден од најголемите фаворити за освојување на првиот грен слем турнир сезонава, „Австралија опен“.

Потсетување дека во изминатиот период Ѓоковиќ со српската репрезентација успеа да го освои АТП купот, откако во финалето ја совладаа селекцијата на Шпанија.

„Австралија опен 2020“ ќе се одржи во периодот од 20 јануари до 2 февруари, а титулата од минатата година ја брани Новак Ѓоковиќ.

Ноле за австралиските медиуми изјави дека тој не е единствениот кандидат за трофејот.

– Мислам дека ќе биде неизвесно, како на секој грен слем турнир. Мислам дека нема некој изразен фаворит. Се одвојуваат Федерер, Надал ј и јас, поради искуството, ранкингот и сето останато поради што со години ние тројцата сме најголемите фаворити – рече Ѓоковиќ.

Но, додаде уште тројца на неговата листа можни шампиони на „Австралија опен 2020“.

– Ги имаме уште Медведев, Циципас и Тим, кои играат навистина одличен тенис. Покажаа дека се зрели за големата тениска сцена, дека можат да ги предизвикаат најголемите играчи на светот и да ги победат. Сите говорат за следната генерација на играчи кои би можеле во иднина да освојуваат грен слемови. Мислам дека се ближат кон таа цел. Иако се надевам дека нема да успеат оваа сезона – додаде српскиот тенисер.