Израелскиот претседател Рувен Ривлин денеска му додели мандат на лидерот на партијата Бело – Сино, Бени Ганц да формира коалициска влада, откако не успеа досегашниот премиер Бенјамин Нетанјаху.

Генц, поранешен армиски командант има рок од 28 дена да формира Влада, а ако не успее во тоа, тогаш во Израел најверојатно ќе се одржат нови парламентарни избори, трети од април.

Нетанјаху претходно изјави дека се откажува од напорите да формира нова влада, откако не успеа да обезбеди мнозинство во Парламентот по септемвриските избори.

Лидерот на партијата Ликуд истакна дека му го враќа мандатот на претседателот Ривлин, откако се обиде „да воспостави влада на широко единство”.

– Последните неколку недели се обидував да го седнам Ганц на преговарачка маса, да формирам влада на широко единство и да избегнам нови избори, нагласи Нетанјаху.

На изборите одржани минатиот месец, Ликуд на Нетанјаху освои 32 места во Парламентот, а партијата Бело – Сино на Ганц 33, од вкупно 120 пратенички мандата.