Гласна музика, знамиња во боите на виножитото се веат низ центарот на Скопје. Утрово во 10 часот започна втората Парада на гордоста што ја организира Националната мрежа против хомофобија и трансфобија.

Паркот е преполн со учесниците кои ќе маршираат низ центарот на градот, покрај Владата, до градскиот парк

Со присуство на стотици луѓе, музика која ечеше од подвижна бина, со знаменца и транспаренти, меѓу кои се виори и пораката  „Доста е криење“, парадата стартуваше.

Скопје Прајд е настан од и за ЛГБТИ заедницата, но и за сите поддржувачи на борбата за еднаков третман на сите луѓе. Прајдот е протест, но и прослава, на која ги реафирмираме надежите за посолидарно, похумано и поправедно општество, се вели во соопштението испратено до јавноста.

Забавата во моментов се одвива пред Порта „Македонија“, а ќе заврши кај Школка во Градскиот парк. Претседателот Стево Пендаровски, министeрката за одбрана Радмила Шекеринска, министерката за труд и социјална политика Јагода Шахпаска и лидерката на ДОМ Маја Морачанин денеска се меѓу оние кои дадоа поддршка со лично присуство на Парадата на гордоста што по втор пат се одржува во Скопје.

Годинава мотото на Парадата на гордоста е „Вон ѕидовите”.

Парадата на гордоста ќе ја отвори нашиот годинашен претставник на песна на Евровизијата Васил Гарванлиев со песната „Here I stand“.