Од Владата за „Слободен печат“ објаснуваат дека одлуката што е донесена избраните и именувани функционери да патуваат во странство а потоа да не одат во задолжителен карантин како другите граѓани, е донесена поради искучителен јавен интерес за службеното патување и дека функционерите нема да одат во карантин зашто ќе следат посебен заштитен протокол.

Од владата велат дека со опаѓањето на интензитетот на ширењето на вирусот и со мерките кои овозможија контрола и создавање на услови за попуштање на рестриктивните мерки, се создадоа и услови Владата на Северна Македонија донесе одлука да се дозволи организирање на службени патувања во странски држави тогаш кога постои исклучителен јавен интерес службеното патување да се одржи и кога има причини кои не трпат одлагање.

,,Ова е особено важно и заради фактот дека има ситуации кога службените патувања се неопходни заради координација и други работни активности поврзани со мерки за COVID-19 во регионот. Со оваа одлука е донесен и заклучок да се подготви посебен протокол и препораки од страна на Комисијата за заразни болести при Министерството за здравство, кои ќе ги опфатат условите за одржување на потребното растојание меѓу учесниците на состаноците и средбите, како и носењето и начинот на употребата на личната заштитна опрема, односно маските и хируршките ракавици. Оваа одлука е донесена и од причини што постои уверување дека доколку се определат прецизни мерки за заштита и превенција и доколку тие мерки строго и одговорно се спроведуваат, ќе нема потреба од мерката државен карантин, бидејќи службените патувања ќе се остваруваат во земји кои ги применуваат мерки за претпазливост препорачани од Светската здравствена организација и од соодветните домашни институции одговорни за стручно определување на условите за здравствена безбедност, и затоа што функционерите треба да продолжат да ги извршуваат своите обврски” велат од владата за Слободен печат.