Европскиот парламент нема дилеми дека треба да се додели датум за почеток на преговорите и доколку одлуката зависеше само од Парламентот, Македонија одамна ќе ги почнеше преговорите. Ваква порака добил претседателот на Собранието Талат Џафери по средбите со пратеници во Европскиот парламент во Стразбур.

– Европратениците истакнаа дека и во иднина ќе продолжи силната поддршка на Собранието на Македонија, а соработката во форма на Мешовитиот парламентарен комитет и Жан Моне Дијалогот ќе продолжат на редовна основа. Претседателот на Комисијата за надворешна политика, Дејвид Мекалистер, истакна дека за Европскиот парламент, Република Северна Македонија останува приоритет, постои широка поддршка и покрај неправедната одлука од страна на Советот. Направената грешка не може да се коригира, но нема да се дозволи истата да се повтори во иднина- соопштија од кабинетот на Џафери.

Од таму информираат дека Џафери е поканет да ја следи и дебатата во Европскиот парламент за резолуцијата за отворање пристапни преговори со Северна Македонија и Албанија.