Кристијано Роналдо од 2003 до 2009 година го носеше дресот на Манчестер јунајтед, а негов тренер беше легедарниот сер Алекс Фергусон кој го „направи“ Португалецот еден од најдобрите фудбалери во историјата.

По 12 години, Роналдо и Фергусон повторно се заедно, Португалецот се врати во Јунајтед каде легендарниот менаџер има улога во управата и двајцата заедно гостуваа на клупската телевизија на која открија многу детали од нивната соработка.

Еден од моментите кои го натераа Роналдо да пушти солзи е моментот од пред 15 години, кога Фергусон му дозволил на Португалецот да го посети болниот татко. Роналдо сè уште ги памети зборовите кои тогаш му ги кажа сер Алекс.

– Тој можеби не памети, но јас ќе ја раскажам приказната бидејќи направи преубав потег. Ми рече: Кристијано, оди на два или три дена. Тоа беше во време кога татко ми лежеше во болница. Јас му пријдов на сер Алекс за да го прашам дали може да одам да го посетам татко ми бидејќи се чувствував многу лошо. Тогаш ми кажа дека ќе биде тешко бидејќи имаме важни натпревари, но дека имам дозвола да го посетам татко ми. Тоа беше многу важно за мене, сер Алекс направи се што ми вети во кариерата – изјави емотивниот Роналдо.

Своја верзија на приказната има и легендарниот менаџер.
– Знаев дека неговиот татко е боле и дека Кристијано сака да биде покрај него. Татко му беше во болница, а на Роналдо му беше важно да го посети. Во такви моменти, клубот не е важен, некои работи се поважни. Без никакви дилеми, семејството е една од нив и никогаш не смеете да го ставите клубот пред семејството – рече Фергусон.

Таткото на Роналдо по долго боледување почина во 2005 година. Долги години се бореше со алкохолизмот, а како последица на алкохолот имаше големи здравствени проблеми.