Убедливата победа на Лацио над Салернитана во петокот навечер остана во сенка на шокантната изјава на еден од најдобрите фудбалери на римските „небесно-сини“, Луис Алберто.

Од 2016 година ги брани боите на Лацио, воедно има важечки договор уште три сезони, но тој одлучи да го напушти клубот на крајот од оваа сезона.

– Не сакам повеќе ниту едно евро од клубот, си заминувам. Последните неколку недели беа многу тешки за мене. Не знам каков проект ќе биде тука, но можам да кажам дека сигурно нема да бидам дел од истиот следната сезона. Веќе побарав од клубот за раскин на договорот.

Тоа ќе биде вистинскиот потег, тоа што бев дел од овој клуб ми значеше многу. Дојде моментот да се повлечам и да го оставам своето место за другите – рече Алберто.

Шпанецот во Лацио пристигна од Ливерпул и за сето ова време во нешто повеќе од 300 одиграни натпревари постигна 51 гол и забележа 76 асистенции.