„Дојче Телеком“ нема да наплаќа за разговорите меѓу Германија, Турција и Сирија
Германскиот телекомуникациски гигант „Дојче Телеком“ објави дека нема да наплаќа за разговори меѓу Германија, Турција и Сирија до средината на февруари, со цел да ја олесни комуникацијата по страшниот земјотрес кој однесе илјадници животи. Компанијата нема да наплаќа од корисниците за разговори од 6 февруари, ретроактивно, до 15 февруари, а сите клиенти на Телеком и Конгстар ќе бидат ослободени од таксата, се вели во соопштението објавено денеска.
„Сликите и извештаите кои моментално ни пристигнуваат од Турција и Сирија длабоко не погодуваат и тагуваат. Нашите мисли се со жртвите и нивните семејства“, напиша извршниот директор на ДТ Тим Хотгес на „ЛинкдИн“. „Сакаме да покажеме солидарност“, додаде Хотгес, посочувајќи дека многу работници на ДТ имаат семејни врски со Турција и Сирија.
Повеќе од три милиони германски државјани се со турско потекло, забележува Ројтерс, а Германија примила и еден милион сириски бегалци од граѓанската војна. Дојче Телеком планира да донира еден милион евра за хуманитарна помош.
Според моментално достапните податоци, земјотресот однесе повеќе од 9.500 човечки животи во Турција и Сирија.